கன்னல் தமிழ்

கன்னல் தமிழை
.....கண்ணாய்ப் போற்று
இன்னல் வந்தால்
.....இறந்து காப்பாற்று
என்னில் தாயே
.....எனவே வணங்கு
உன்னில் மொழியே
.....உறவைத் தொடங்கு


அம்பலம் ஏறா
.....அன்னைத் தமிழை
அமணர் வகுத்த
.....அற்புத வழியில்
கம்பன் அல்ல
......காளையர் காப்பர்
நம்பன் முருகன்
.....நம்பி யாருமில்ல


மும்மொழியை வேண்டுவர்க்கு
......முக்கனியின் இனிமையை
செம்மொழியாம் தமிழின்
.....சுவையை கூறிடுவாய்
எம்மொழிக்கும் ஈடில்லை
.....என்னினத்தின் அடையாளம்
அம்மொழியே தமிழாம்
.....அதனால் வாழியவாம்

தமிழா

உள்ளத்து மொழியில் பேசிடவே
   உண்மை உரைப்பேன் தோழர்களே
தெள்ளத் தெளிவா கூறிடுவேன்
   தென்சீமை தமிழ் உயர்ந்ததுவே
அள்ள அள்ள அமுதாவதை
   ஆங்கிலத்தில் டமில் என்றுரைப்பதோ
கொள்ள வேண்டிய தமிழை
    கொல்ல துணிந்தீரே தோழரே

மின்னும் அழகை ரசித்து
    மீண்டும் தவறு செய்கிறீரே
தின்னும் யாவும் நல்லதல்ல
  திகட்டி  விடாதோ தோழரே
பொன்னும் விஞ்சும் ஒளியாய்
   பொதிகையில் தவழ்ந்து வருகிறாள்
இன்னும் அவள் கன்னியாய்
   இந்த உலகில்தான் வாழ்கிறாள்

அம்மா என்ற தமிழோ
   அந்தோ மலர்ந்தது மம்மி
சும்மா சொல்லக் கூடாது
   சொரணையில் இவர்கள் டம்மி
இம்மா மொழியின் பெருமை
   இவ்வுலகில் யாருக்கு கம்மி
எம்மா புகழ் வந்தாலும்
   என்மொழிக்கு இடரில்லை இம்மி

கன்னி

நறுமணம் உலவி வர
நந்தா விளக்கு ஓளிவீச
நாற்திசையும் புகழிருக்க
நான் காணுகிறேன் கன்னியவளை

பெயர் சொல்லி அழைக்கிறேன்
பேதையவள் துள்ளித் திரிகிறாள்
பொன்னுடல்தனை தொட்டு பார்க்க
புன்னகையை அள்ளி வீசுகிறாள்

பேரழகி என் கைபிடிக்க
பண்டிதனாய் கிறுக்க
பாவையவள் தீஞ்சுவை என்றாள்
பலவித கனவு கண்டேன்

அமுதொன்று பருகினேன்
அஃது  போல் வேறொன்றில்லை
அது மா, பலா போன்றதென - சுவை
அறியா நாவலர்  உரைக்கலாம்

என்னை பேச வைத்தாள்
எழுலுகை பாட வைத்தாள்
எங்கெங்கும் அவள் ஓவியம்
எனினும் எனக்கவள் காவியம்

ஆன்றோர் பலரும் வாழ்த்த
அவளை நானும் மணக்கிறேன்
என்னுடன் வாழும் நேரிழையாள்
ஏகாந்த "தமிழ்" கன்னியல்லவோ

ஆங்கிலம்

அறிவா அற்புதமா
அறிவியலா அஞ்ஞானமா
புரியாச் சொற்பதமா
புரியயவை சாதகமா
தெரியா மொழிகள்
தேவையா சுமையா
சராசரிக்குச் சரியாகுமா
சாப்பாட்டின் பொருளாகுமா

ஆறாயிரம் மொழியில்
ஆண்ட மொழியானதால்
தராதரம் வந்ததா
தமிழும் தாழ்ந்ததா
திராவிட வேராய்
திகழும் தமிழ்மொழி
பரவட்டும் திக்கெட்டும்
பழகிடுவோம் செம்மொழி

மொழியொரு வழியே
மானுடத் தொடர்புக்கு
மொழியா யாவும்
மூடிவைத்தப் பாலாகும்
இழிவா உயர்வா
இதுவென் மொழியென்றிட
தெளிவாய்ப் பகர்வாய்த்
தேன்தமிழ் நம்மொழியென

சிந்தனை மொழிக்கல்ல
சீர்தூக்கி ஆயும் மனிதனுக்கே
நிந்தனை வழியல்ல
நினது மொழியும் வாழட்டுமே
நந்தனை எரித்து‘
நாயன்மா ராக்க வேண்டாமே
நம்தமிழை வளர்க்க
நாமொன்றும் நாண வேண்டாமே

கண்மூடித் தாய்தமிழில்
கண்டதும் இல்லையெனத் தூற்றாமல்
கண்டுபிடிக் கல்வியறிவில்
காணும் பொருளின் சொற்பொருள்
சென்றுபடி மேலதேயம்
சிறப்பான எதையும் கற்றுவா
கற்கண்டுத் தமிழ்மொழியில்
கற்றதைப் பரப்பு வெற்றிபார்

அம்மொழியில் பேசிடவே
ஆனந்தமா அல்ல பெருமையா
செம்மொழித், தமிழுனுக்கு
சேந்தேள் விஷமா கூறுமைய்யா
பன்மொழிப் புலமை
பண்படுத்த வேண்டுமே உன்னை
என்மொழிப் பெருமை
எவரும் பேசிடப் பெருகுமே

ஆங்கிலமொரு மொழிதான்
அதுபோலவே கிரேக்கமும் சீனமும்
இங்கிதமாய்க் கூறாதே
இகலோகம் சுற்றிட உதவாதென
எங்கெல்லாம் போவாய்
எதற்காய்ப் போவாயென சொல்லிடேன்
அங்கெல்லாம் நீபேசும்
ஆங்கில அழகைப் பார்த்திடுவேன்

தமிழ். தமிழா

ஜப்பான் காரன்
சரக்கு விக்க
சட்டென படிக்கிறான்
தமிழை படிக்கிறான்

வடக்கிருந்து
வந்த நடிகை கூட
வாழ்வளித்த தமிழென
அழகாய் சொல்கிறாள்

நோக்கியா, பிளாக் பெரி
சாம்சங், சோனி
அத்தனை கைபேசியும்
தமிழில் தட்டச்சிட

குகூள், யாகூ
விக்சனரி என
விரியும் தமிழை
வெறுப்பாயா தமிழா

இனத்தில் தமிழனாய்
இங்கிலிஷ்ஷில் பேசி
இனியதமிழ் தெரியாதென
சிரிப்பாயா?.... சிந்தி

“தமிழ்” கடவுள்

பன்மொழி புலமை

பக்தனுக்கு உண்டா

ஏழேழு உலகை

இரட்சித்து காக்கும்

பரமனுக்கும் உண்டா

அறிந்தது அறியாதது

தெரிந்தது தெரியாதது

புரிந்தது புரியாதது

சிவாஜி  - சிவனாய்

உச்சரிக்க அழகு

அழகன் முருகனோ

அவனப்பன் சிவனோ

அவதார பெருமாளோ

அவர்களது பத்தினிகளோ

அறியாதது ஏதுமுண்டோ?

கைலாய வாசமென்பதால்

காதில் விழுந்தவை

சமஸ்கிருதமாம் - ஆதலால்

பைந்தமிழ்

மைந்தனுக்கும் தெரியாதாம்

காமாட்சி

“கற்றது தமிழ்” அல்லவாம்

மீனாட்சிக்கு

சொக்கனை தெரியுமாம்

சங்கத்தமிழ் புரியாதாம்

தேவாரமோ திருவாசகமோ

தமிழில் ஒரு வாசகமோ

புரியலையாம்

தில்லை நடராசனுக்கு – இது

தீட்சிதர்கள் சொன்னது

ஆலயத்தம்மனும்

பாளையத்தம்மனும்

பைந்தமிழில் பூசிக்க

பரவசமடைந்ததாய்

பக்தர்கள் சொல்ல

சுப்புணி சுட்டபழம்
சூத்திர மொழியில்
கேட்டதாக அவ்வை
பாட்டெடுக்க - அவாள்
தேவமொழி என்றனரே

அனந்தனுக்கு

ஆராரோவோ அல்ல

பூபாளமோ

சமஸ்கிருதத்தில் வேண்டுமென

சட்டம் போட்டானா?

அண்ட சராச்சரத்தை காப்பவனுக்கு

அய்யாயிரமாண்டு தமிழ் தெரியாதாம்

அப்படியா! – அக்குடும்பத்தை

ஆரம்ப பள்ளிக்கு அனுப்புவோமா

ஆனா, ஆவன்னா கற்க?!