துபாய்

 

வாழ இயலாத
வரண்ட பாலைவனம்
வாரி வழங்கிய – எரி
வாயு, எண்ணெய்யால்

பூலோக சொர்கமென
புதிய புராணத்தை
பூஜிக்கத் தொடங்கையில்
பூகம்பம் நிகழ்ந்தது

பன்னாட்டு பணக்காரர்கள்
பாம் ஜுமைராக்களில்
புர்ஜ் கலீபாக்களில்
புரண்டு கொள்ள

தங்கத்தில் குடியுரிமை
தந்த மன்னர்
தப்பித்து அமெரிக்காவில்…
தன்னையே காத்துக் கொள்ள

குருக்ஷேத்திரப் போரில்
கௌரவம் என
பஹ்ரைனோடு துபாயும்
அமெரிக்காவை ஆதரிக்க

ஏவுகணைகள், ட்ரோன்களை
எதிர்கொள்ள இயலாத
அமீரகத்தை
அம்போவென விட்டுவிட்டு

தங்க குடியுரிமை
தகரமாய் கூட
தரத்தில் இல்லையென
பறந்து விட்டனர் அப்பாவிகள்

ஆம், அறுபது சதவீத
அந்த நாடோடிகள்
ஆயுள் முக்கியமென
அடுத்த சொர்க்கத்தைத் தேடிட

பன்னாட்டு வர்த்தகத்தின்
வணிகத் திருவிழாக்கள்
இணையில்லை என்றவர்கள்
எங்கோ மறைந்தனர்

வெறிச்சோடிய சாலைகள்
விமான நிலையங்கள்
ஒருவருமற்ற
உயரமான கட்டிடங்கள்

அனாதையாய்
ஆங்காங்கே நிற்கும்
உயர்விலை கார்கள்
செல்லப் பிராணிகள்

காரணம் யாதென்று
மேதினி அறிந்தாலும்
மேட்டிமை கொண்ட
மேற்குலகம் நீட்டிக்கும் போரை

அரசு இயந்திரங்கள்
உம்மென்றோ
ஆம்மென்றோ
உருப்படியாய் ஏதும் செய்யாது

மானுடத்தை காக்க
மக்கள் நாமே
போரை எதிர்த்து
போராடுவோம், வாருங்கள்

அ. வேல்முருகன்

கொலைபழி சுமத்து

ரோம் நகரம்
பற்றி எரிகையில்
நீரோ மன்னன்
"ஃபிடில்" வாசித்தது வரலாறு

ஈரானோடு
இஸ்ரேலும் பற்றி எரிய
அமெரிக்க அதிபரால்
இரத்த ஆறு ஓடுகிறது

மலைகளுக்கிடையே
பேரொளித் தோன்றி
பத்துக் கட்டளைகளை
நெதன்யாகுவுக்குச் சொல்லுமோ

இறை தூதர்கள்
எங்கேயாவது தோன்றி
இந்தப் போரை
இருநாட்களுக்குள் முடிப்பார்களோ

பேரரசுகள் வீழ்ந்து
வல்லரசுகள் உருவாகிட
நாகரிகத் தொட்டில்கள்
நாசமாகிதான் போயின

மேலாதிக்க பேராசையில்
மேலும் சிலநாடுகள்
மேன்மை பொருந்திய
மகுடத்திற்கு காத்திருக்கின்றன

மாடமாளிகைகள்
மணல்மேடுகளாக
மானுட மரணங்கள்
மனதை மாற்றவில்லை

குகைகளில் வாழ்ந்து
குடும்பம் கூட்டமென
கோலோச்சியவர்கள்
பதுங்கு குழிகளில்

நாலுகால் பாய்ச்சலில்
நங்கூரமின்றி அறிவியல்
நாடற்ற நாடோடிகளாய்
நாகரிகச் சமூகம்

மானுட மரணத்தை
மருந்துகாளல் நீட்டித்தவர்கள்
போரிடும் காரணத்தை
பொய்யாய்தான் உரைத்தனர்

இது, சுதந்திரத்திற்கான
விடுதலைப் போரா
சுரண்டுவதற்கான
மேலாதிக்கப் போர்

வெல்வது யாராக இருந்தாலும்
வீழ்வது மக்களே
கொல்வது கொற்றவனென்பதால்
கொலைபழி சுமத்து

அ. வேல்முருகன்

போர்.... காலங்கள்

   

வில், வேல், வாள்

மல்லர்களின் மற்போர்
வீரத்தின் அடையாளமானது
கற்காலம்

காலாட்படை
தேரோடு குதிரைப்படை
யானைப்படை கவசங்களோடு
எக்காளமிட்டது மன்னர் காலம்

வணிக கப்பல்கள்
கொள்ளையடிக்க
போர் கப்பலென
பெயர் மாறியது கடந்தகாலம்

தூப்பாக்கித் தோட்டாக்கள்
தொலைதூர பீரங்கிகள்
கண்ணி வெடிகள்
காலாவதியாதி நாளாச்சோ

விமானப்படை - அதி
விரைவுத் தாக்குதல்கள்
வேவு பார்க்கும் ரேடார்கள்
துல்லியமாய் தாக்குமோ

ஒவ்வொரு போரும்
ஒருசில கண்டுபிடிப்பை
மானுடத்தை அழிக்க
உலகில் உருவாக்கும்

இன்று, டிரோன்கள்
கொத்து குண்டுகள்
பாலிஸ்டிக் ஏவவுகளை
செயற்கைகோள் உளவுகள்

திருப்பாச்சி அரிவாளும்
தீப்பிழம்பு ஏவுகணைகளும்
தீர்த்துச் சொல்லும்
தீர்வுகள் ஏதுமில்லை

    தகவல் குறியீடுகளை
    கணணியால் பூட்டவிழ்த்து
    இரகசியங்களை அறிவது
    இராப்பகலா தாக்கதானே

    ஆல்ஃபிரட் நோபிள்
    அன்று நொந்தது
    அந்த டைனமைட்டுகள்
    அமைதி காக்காது என்றுதானே

    ஆயினும் ஆயுதங்களை
    அகிம்சையால் வெல்வோமா
    அதுவொரு பகற்கனவு
    அதனை புறந்தள்ளு


    அ. வேல்முருகன்

இன்று போய் நாளை வா

பொருளாதார தடைகளினால்
ஏற்கனவே
என்னால் கொல்லப்பட்டவர்கள்
போரில் பொருத முடியாதென்றா

எப்ஸ்டின் கோப்புகளுக்காக
இஸ்ரேலுடன் சேர்ந்து கொண்டு
என்னைத் தாக்குவதோ
எண்ணெய் வளங்களை கொள்ளையிடவோ

ஏவுகணைகளோடு
ஏராளாமான பொய்களோடு
ஒருமுறையல்ல எத்தனைமுறை
பிரம்மாஸ்திரத்தை ஏவினாலும்

இறையாண்மை கொண்ட
எந்நாடும் எதிர்க்கும்
இல்லாத நாடுகள்
அமெரிக்காவை நத்திப் பிழைக்கும்

பலவீனமான நேரத்தில்
பழித் தீர்க்காது
பலம்பெற்று வா என்பது
பாழும் கிணற்றில் வீழ்வதல்லவா

ஆக, அயோத்தி இராமன்
நிராயுதபாணி இராவணனை
பார்த்துரைத்த
கட்டுக்கதையல்ல இந்தப் போர்


அ. வேல்முருகன்

போரும் பொய்யும்

இரண்டு நாளில்
இருக்குமிடம் தெரியாது
ஈரான் அழிக்கப்படும்

அமைதியை நிலைநாட்ட
இரசாயன ஆயுதங்கள்
அடியோடு ஒழிக்கப்படும்

ஆயுதங்களை
அடியோடு ஓழித்து விட்டோம்
அடிபணிந்து விடுவார்கள்

உச்சத் தலைமையை
ஒழித்து விட்டோம்
திக்குத் தெரியாதிருக்கிறார்கள்

ஹார்மோஸ் நீரிணையில்
அச்சமின்றி செல்ல
ஆப்ரகாம் லிங்கன் கப்பல் வழிகாட்டும்

நேட்டோ நாடுகள்
நேசக் கரம் நீட்டுவார்கள்
நிம்மதியாய் இருங்கள்

பொறுத்திருங்கள்
பொருளாதாரத் தடைகளால்
போர் மட்டுப் படுத்தப்படும்

ஏவுகணைகளை இடைமறித்தோம்
ஏகப்பட்ட இழப்புகள்
யாருக்கு?

15 நாட்கள் கடந்து விட்டன
பதிலடி தொடர்கிறது
இஸ்ரவேலர்களை இறைவன்
.........காப்பாற்றுவானா?


அ. வேல்முருகன்

சீன எல்லை

தேசப் பக்தி
திரும்பியப் பக்கமெல்லாம்
சீன எதிரியை
சீக்கிரம் அழித்திட

உயிர்கள் 20
உலகை விட்டு மறைந்தது
ஊர்சுற்றி
ஒரு வார்த்தை சொல்லவில்லை

உலக நாடுகள்
உம் என்றிருந்தன - ஏன்
ஊர் சுற்றியை
உலகம் கைவிட்டது

சீனத் தயாரிப்புகளை
தவிர்க்கச் சொல்லி
தேசப் பக்தர்கள்
கோரிக்கை வைக்க

ஆம் என்றே
ஆமோதிக்க
அச்சம் உண்டா
அமைதி தவழ்கிறதே

அரசுதான்
அறிவிக்க வேண்டும்
இறக்குமதிக் கொள்கையை
ஆகட்டும் என்றொரு வார்த்தையில்லை

குறைந்த விலை
குறைந்தக் கூலி
குவிந்தக் கூட்டத்தை
குறையாதுப் பார்த்துக் கொண்டான்

உலகமயமாக்கலில்
உள்ளூர் தொழில்கள்
ஊனமாயினப் போட்டியில்
ஊமையாய் அமைதிக் காத்தனர்

அமெரிக்க ஐபோன்
இந்தியாவில் விற்க
சீனம் தயாரித்தது
சினமெதற்குப் பக்தர்களே

கொரோனாவின் தாக்கத்தால்
பன்னாட்டுத் தொழில்கள்
சீனாவிலிருந்து புலம்பெயருமென
கனாக் கண்டாய்

ஐரோப்பிய மக்களுக்கு
ஆசிய மக்களுக்கென
தரம்பிரித்து தயாரிப்பவன்
வீழ்வான் என நினைத்தாயோ

ஆயுதமின்றி வீழ்ந்தது
அவனல்ல - நம்
புதல்வர்கள் - ஆக
அரசியலைப் புரிந்து கொள்